“Лайк байна, харин орлого алга”: Пост бичээд л байдаг ч борлуулалт өсөхгүй байгаагийн бодит шалтгаан

Өглөө бүр та компьютер эсвэл утасныхаа ард сууж, “Өнөөдөр ямар пост хийх вэ?” гэж толгойгоо гашилгадаг уу?

Сайхан зураг дизайн бэлтгэж, чамин гоё үгс хайн байж олон нийтийн сүлжээнд оруулна. Орой нь постой шалгахад хэдэн зуун “лайк”, хэдэн шэйр цугларсан байх ч… Чат хэсэгт орлого орох хэлцэл, захиалга ганц ч орж ирээгүй байх нь бий.

Хэрэв энэ дүр зураг танд танил санагдаж байвал нэг зүйлийг маш сайн ойлгох хэрэгтэй: Таны бизнес контент дутагдсандаа биш, харин “Борлуулдаг бичвэрийн систем” (Copyselling System) байхгүйд хамаг хамаг хөдөлмөрөө алдаж байна.

Өнөөдөр сошиал медиа орчинд хүмүүсийн анхаарал маш богино хугацаанд сарнидаг. Гэвч тэд урт бичвэр уншдаггүй юм биш, харин тэдэнд хамааралгүй, уйтгартай контентыг уншдаггүй.

Тэгвэл яаж энгийн нэг сошиал пост бичихээс татгалзаж, уншигчийг худалдан авагч болгон хувиргах блог болон нийтлэл бэлтгэх вэ? Жоанна Вибегийн The Copyselling System номын гол зарчмаас хуваалцъя.

1. Тархиндаа биш, Хэрэглэгчийн сэтгэгдэл дунд хай (VOC зарчим)

Олон маркетерууд, бизнес эрхлэгчид контент бэлтгэхдээ өөрсдөө зохиож (Brainstorming) бичдэг. “Манай бүтээгдэхүүн маш сайн, тав тухтай, чанартай” гэх мэт хүн болгоны хэлдэг хэвшмэл үгс ашигладаг.

Гэвч сайн бичвэр бол зохион бичлэг биш, сонсох урлаг юм.

Үүнийг бичвэрийн ухаанд VOC (Voice of Customer) буюу Хэрэглэгчийн өөрийнх нь дуу хоолой гэж нэрлэдэг. Борлуулалтыг 2-3 дахин өсгөдөг тулгуур бичвэрүүд нь дараах газруудаас олддог:

• Хэрэглэгчдийн бичсэн сөрөг болон эерэг сэтгэгдлүүд (Reviews)
• Борлуулалтын чат болон дуудлагын бичлэгүүд
• Сошиал орчин дахь хүмүүсийн бухимдал, тулгамдаж буй асуудлын тухай постууд

Хэрэглэгч таны блог эсвэл постыг уншаад “За байз, энэ яг намайг, миний бухимдлыг биччихсэн юм биш үү?” гэж бодох тэр мөчид л жинхэнэ анхаарал баригддаг.

2. Асуудлыг “Жинхэнэ динозавр” болгож харуул (Mega Mean Mouse™)

Энгийн контент болон борлуулалт хийдэг контентын гол ялгаа нь Асуудлыг хурцгах чадварт оршдог.

Хүмүүс асуудалтайгаа дасан зохицож, мартахдаа амархан байдаг. Южин Шварцын хэлсэнчлэн “Илүү сайн хавх зарахаас өмнө, хүмүүст ямар аюултай хулгана гэрт нь байгааг сануул”.

Та өөрийн шийдлийг санал болгохоос өмнө:

1. Тухайн асуудлаа шийдэхгүй удаавал ямар их цаг, мөнгө, стресс алдах вэ?
2. Тэр асуудал нь тэдний амьдрал, бизнест яг одоо ямар сөрөг үр дагавар авчирч байгааг хэтрүүлэггүйгээр, маш тодорхой дүр зураглалаар харуул.

Асуудал ямар аюултай бөгөөд яаралтай вэ гэдгийг мэдэрсэн цагт л хүн шийдэлд мөнгө төлөхөд бэлэн болдог.

3. Бурууг хэрэглэгчид биш, хуучин системд өг (The Blame Game & Problem Mechanism)

Хэрэглэгчид олон удаа бусад бүтээгдэхүүн, туршилтыг хийж үзээд бүтэлгүйтсэн байдаг. Энэ үед тэдэнд “Би чадахгүй байна, би буруу зүйл хийжээ” гэх сэтгэгдэл төрүүлж болохгүй.

Үүний оронд:

• Асуудлын механизмыг нэрлэ: Тэдний өмнө нь туршиж байсан аргууд яагаад амжилтгүй болсныг “хэрэглэгчээс бус, тухайн хуучин арга барилын дутагдалтай талаас” гэдгийг ойлгуул.
• Хүмүүсийг “Энэ миний буруу биш байж, хуучин систем нь өөрөө болохгүй байсан юм байна” гэж бодоход нь тусал.

Ингэж чадвал та тэдний итгэлийг олж, шинэ шийдэл хүлээж авахад сэтгэл зүйг нь бэлтгэж чадна.

4. “Уриалга” тань зөвхөн үнэ цэнийг илэрхийлэх ёстой (Call to Value)

Нийтлэлийнхээ төгсгөлд бараг хүн бүрийн бичдэг “Манайх руу чат бичээрэй”, “Утсаар холбогдоорой” эсвэл “Худалдаж ав” гэх хэвшмэл уриалгаас татгалз.

Товчлуур болон уриалга хэсэгт (Call to Action) уншигчийн авахыг хүсэж буй шууд үнэ цэнэ, үр дүнг (Call to Value) бичих хэрэгтэй:

• ❌ Уламжлалт: “Бүртгүүлэх”
• ✅ Өгөөжтэй: “Өдөрт 2 цаг хэмнэх аргыг одоо авах”
• ❌ Уламжлалт: “Манай сургалтад суух”
• ✅ Өгөөжтэй: “Сошиал борлуулалтаа 2 дахин өсгөх системтэй болох”

Дүгнэлт

Контент бичих нь гоё, уран үгсийн тэмцээн биш. Энэ бол хэрэглэгчийнхээ зовлонг сонсож, түүнийг нь яг өөрийнх нь үгээр сануулан, оновчтой шийдлийг санал болгох инженерчлэл юм.

Завгүй бизнес эрхлэгч та өнөөдрөөс эхлэн постоо заавал тархинаас зохиох гэж хичээх шаардлагагүй. Хэрэглэгчдийнхээ бичсэн чат, сэтгэгдлийг тэмдэглэж аваад, дээрх зарчмаар нийтлэлээ бүтэцжүүлээд үзээрэй.